Skjeringstidspunktet – kvifor det er avgjerande
Fullstendig søknad markerer eit rettsleg skjeringstidspunkt. Det er først når kommunen mottar ein slik søknad at saksbehandlingsfristen deira på 12-veker startar, jf. pbl. § 21-7.
Kva tid 12-vekers fristen startar, kan ha fleire store og viktige konsekvensar for byggesaka. Det er mellom anna det plangrunnlaget som gjeld ved utløpet av fristen som er bindande, noko som inneber at dersom kommunen går over fristen, og det i mellomtida kjem strengare regelverk, skal ikkje desse nye reglane leggast til grunn.
Fullstendig søknad er dermed eit «ankringspunkt» som sikrar rettstryggleik og forutsigbarheit for tiltakshavar, og som samstundes set tydelege rammer for kommunen.
Vurderinga av kva tid ein søknad er fullstendig, er med andre ord ikkje berre er eit teknisk spørsmål, men kan vere styrande for resultatet i byggesaka.
Dei to søknadsspora; eitt- og to-trinnssøknadar
Byggesøknadar kan sendast som eitt-trinnssøknad eller delast opp i rammesøknad og seinare søknad om igangsettingsløyve.
Eitt-trinnssøknad eignar seg best for relativt enkle tiltak, der du ventar få innvendingar frå kommunen eller naboar. Alle ansvarsrettar for prosjektering må vere på plass frå starten, og når løyvet er gitt, kan byggearbeidet starte straks. Fordelen er at heile prosjektet blir vurdert samla, noko som kan gjere saksbehandlinga raskare og meir forutsigbar.
To-trinnssøknad – rammesøknad følgd av igangsettingsløyve – passar betre for større eller meir komplekse tiltak der detaljprosjektering og ansvar kan vere uavklart i starten. Først fastset kommunen rammene for tiltaket gjennom rammesøknaden. Deretter må alle ansvarsrettar og detaljar vere på plass før igangsettingsløyve kan givast. Arbeid kan ikkje starte før igangsettingsløyve er innvilga, men prosessen gir større fleksibilitet i planlegginga og kan vere nyttig når prosjektet krev fleire fagområder og meir omfattande koordinering.
Innhaldskrava i lova: Pbl. § 21-2
Plan- og bygningslova § 21-2 stiller krav til kva ein byggesøknad skal innehalde. Søknaden skal vere skriftleg, underteikna av tiltakshavar og ansvarleg søkjar, og innehalde dei opplysningane som er naudsynte for at kommunen kan vurdere tiltaket. Dette omfattar mellom anna:
- opplysning om eventuelt krav om dispensasjon, jf. kap. 19
- oversikt over ansvarsområde, jf. kap. 23
- grunnlag for vurdering av uavhengig kontroll, jf. § 24-1
- dokumentasjon for nabovarsling og eventuelle merknader frå naboar
- nødvendige uttalar frå andre myndigheiter, jf. § 21-5
Kommunen kan først starte reell behandling når desse krava er oppfylte. Først då er søknaden «fullstendig» – og først då startar 12-vekersfristen i pbl. § 21-7.
Konkretiseringar i SAK10 – kva må til for at søknaden er fullstendig?
Byggesaksforskrifta kapittel 5 konkretiserer kva som må ligge ved byggesøknaden for at den skal reknast som fullstendig etter pbl. § 21-2. Mellom dei viktigaste krava er:
- søknad og vedlegg skal vere oversiktlege og utarbeidde på norsk, svensk eller dansk (§ 5-1)
- dokumentasjon for nabovarsling og haldne fristar (§ 5-2)
- gjennomføringsplan der tiltak krev ansvarlege føretak (§ 5-3)
- opplysningar om tiltaket, til dømes teikningar, plangrunnlag, tekniske løysingar og eventuelle dispensasjonar (§ 5-4)
Desse krava er ikkje berre formalitetar – utan denne dokumentasjonen vil ikkje søknaden bli behandla, og fristane etter pbl. § 21-7 kjem ikkje i gang.
Avslutning
Spørsmålet om kva tid ein byggesøknad er fullstendig, er eit kjernepunkt i byggesaksbehandlinga, og kan vere nøkkelen til framdrift i byggesaker. For tiltakshavar betyr det at korrekt og fullstendig dokumentasjon frå start er avgjerande for å sikre rettstryggleik og forutsigbarheit. For kommunen gir det klare rammer for saksbehandlinga og kva regelverk som skal leggast til grunn.
