Behovet for endringa
Tidsbruk har stor økonomisk betydning i eigedomsbransjen, der forseinkingar kan føre til tomme bygg, tapte leigeinntekter og i verste fall erstatningskrav.
I 2023 vart det sendt mangelsbrev i om lag ein av tre byggesøknadar – og heile 47 % av rammesøknadene hadde manglar. Mange søknadar vert ufullstendige fordi dagens reglar i SAK10 § 5-4 er uklare. Ofte er også søkjar ueinig med kommunen om det faktisk føreligg ein mangelfull søknad i lovens forstand eller ikkje.
Etter dagens system startar behandlingsfristen først når søknaden er komplett. Dersom kommunen oversit fristen, har søkjar rett til gebyrreduksjon.
Dagens regelverk har ofte verka konfliktskapande, og enkelte opplev at mangelsbrev vert brukt for å forlenge fristane.
Endringar i fristberekning og mangelsbrev
Det nye forslaget inneber at fristen skal starte frå det tidspunktet søknaden er motteken – ikkje først når ho er komplett. Dersom søknaden har manglar, skal kommunen gi ein rettingsfrist på om lag tre veker. I denne perioden blir fristen stansa, men ikkje starta på nytt. Kommunen kan forlenge fristen dersom manglane er omfattande, og har òg høve til å avvise søknaden dersom manglane ikkje blir retta innan fristen.
Dette er ei viktig endring samanlikna med dagens praksis: Tidlegare kunne søkjaren få mangelsbrev etter tre månader, og då byrja saksbehandlingstida å løpe frå «null». No vil fristen berre bli stansa i rettingsperioden, slik at total behandlingstid vert kortare og meir føreseieleg.
Klare dokumentasjonskrav i byggesøknader
Lovforslaget inneber òg ei presisering av dokumentasjonskrava i byggesøknader, gjennom endringar i SAK10 § 5-4. Det skal kome eigne føresegner for rammesøknad, igangsettingssøknad og éin-trinnssøknad. Reglane skal tydeleg skilje mellom dokumentasjon som alltid må leggjast ved, og dokumentasjon som berre krevst dersom det er relevant i den konkrete saka.
